حلول مناسبه لحجابك..فساتين السهره للمحجبات

أكثر مشاكل تواجه البنت المحجبة فى مناسبات
السهرة هى الفستان اللى هتلبسه، لإنها مش بتلاقى الموديلات اللى يناسبها،
وده بسبب إن معظم التصميمات الموجودة فى السوق مش مصممة للمحجبات، علشان
كده هقدملك موديلات بسيطة وشيك تحل المشكلة دى

1- لو موديل الفستان “سان
بروتيل” أو حمالات: ممكن تكملى أعلى الفستان بـ “توب” شيفون مش شرط يكون
كامل لحد الوسط ، ويتم تقفيله مع الفستان بواسطة خياطة من جوه الفستان ،
ولازم تختارى القماش الشيفون من نفس لون الفستان أو قماش يليق معاه وطبعا
هتلبسى بادى تحت التوب لأن الشيفون شفاف .

2- لكن لو الفستان فيه
حركة من فوق – زى الكرانيش فى التصميم – أو مثلا بكتف واحد ، تقدرى تكتفى
بالأكمام الشيفون فقط مع البادى ودى سهلة ممكن تنفذيها بنفسك: بس بتزودى
الكم بأستك من أعلى الكتف ومن عند الأسورة هيدى شكل أحلى وهيبقى أسهل فى
اللبس ، ومش لازم يتوصل بالفستان ممكن يبقى منفصل.

3- الجاكيت القصير من
الإقتراحات الممتازة لأنها بتدى شكل فخم وشياكة فى نفس الوقت ده لو انتى
اختارتى القماش الصح إما من نفس اللون أو لون يليق مع قماش الفستان،
والجاكيت فكرة رائعة مش بس علشان تعرفى تلبسى فستان بدون كم ، لأ علشان
كمان لو عايزة تغيرى من شكل فستان عندك .

4- ممكن تقفلى توب بقماش تل أو دانتيل قمشاته مناسبة لقماش الفستان الأصلى وتحته بادى من نفس اللون .

ولو موديل الفستان بقصة مفتوحة من الجنب أو
من الأمام أو من الخلف ، الحل سهل جدا فصلى جيب كلوش أو بالوسع المناسب
للفستان بحيث تظهر كأنها جزء من الفستان أو طبقة متصلة به .

5- الفساتين الواسعة
المنقوشة مش أى تقفيل يليق عليها ، حلها ممكن الأكمام الشيفون اللى قلنا
عليها فى التصميم السابق ، أو البوليرو القصير جداً “بوليرو الأكمام” علشان
ما يغطيش على تصميم الفستان .

.. طبعا أنا اخترتلك أحسن فكرة لكل تصميم
ولكل قصة ، لكن أنتى ممكن تعملى للفستان الواحد كذا فكرة – حسب تصميمه طبعا
– وتبقى بكده بتغيرى من شكل فستانك كل مرة تلبسيه، وتظهرى بشكل شيك وملائم
لحجابك .